36

حکومت کی حمایت کرنے والے جہانگیر ترین سے سبق سیکھیں، مریم نواز

لاہور:مریم نواز نے ڈسکہ کی عوام کو مبارکباد دینے ہوئے کہا کہ انہوں نے اپنے ووٹ پر پہرا دیا عوام کے ووٹوں نے انہیں الٹے پائوں بھاگنے پر مجبور کردیا۔ آٹا، بجلی ، گیس چوروں اور ووٹ چوروں کا احتساب کیا۔
رہنما (ن) لیگ کا کہنا تھا کہ (ن) لیگ کی ڈسکہ میں فتح ایک بہت بڑی تبدیلی کا پیش خیمہ ہے کیونکہ مسلم لیگ (ن) نے یہ مقابلہ حکومتی مشینری کے ساتھ کیا ہے۔ پوری ریاست کی طاقت اور انتطامیہ ایک طرف کھڑی تھی، مسلم لیگ (ن) کو دبانے اور ختم کرنے کی کوشش کی گئی، مسلم لیگ (ن) کے قائد کے خلاف بیانات دیئے گئے ،یہ لوگ جس کی طاقت ختم کرنیکا دعوی کرتے تھے اس نے لندن میں بیٹھ کر انہیں شکست دی۔
مسلم لیگ (ن) کی نائب صدر مریم نواز کا کہنا ہے کہ ڈسکہ کا ضمنی انتخاب بہت اہم تھا کیونکہ جس کی طاقت ختم کرنے کا دعوی کرتے تھے اس نے لندن سے انہیں شکست دی۔
لاہور ہائی کورٹ میں پیشی کے موقع پر میڈیا سے بات کرتے ہوئے مریم نواز نے کہا کہ نیب سیاسی انجنیئرنگ کا ادارہ ہے، حکومت نیب کو مخالفین کے خلاف استعما ل کررہی ہے، یہ مجھے لانگ مارچ کے دن گرفتار کرنا چاہتے تھے
مریم نواز نے کہا کہ جہانگیر ترین اور پی ٹی آئی کے باہمی معاملات پر کچھ نہیں بولنا چاہتی، جب تک جہانگیر ترین کا نمک کھا رہے تھے اور ان کے خرچے پر عیش کررہے تھے اس وقت تک وہ شوگر مافیا نہیں تھے اور اب ان کو سب یاد آگیا۔ حکومت کی حمایت کرنے والے جہانگیر ترین سے سبق سیکھیں۔
پیپلز پارٹی اور پی ڈی ایم سے متعلق مریم نواز نے کہا کہ بلاول بھٹو زرداری سے متعلق میرا واضح موقف سامنے آچکا ہے، پیپلز پارٹی کو نوٹس مسلم لیگ (ن) نے نہیں پی ڈی ایم نے بھیجا، یہ نوٹس متفقہ رائے کے بعد بھیجا گیا، مولانا فضل الرحمان بلاول بھٹو کے خط کا جواب دیں گے، پی ڈی ایم قائم ہے اور اس میں شامل جماعتیں متحد ہیں، پاکستان میں حقیقی تبدیلی لانے کے لیے پی ڈی ایم اکٹھی ہے۔ پی ڈی ایم کا مقصد عوام کو ریلیف دلانا اور ملک کی سمت ٹھیک کرنا ہے۔

اس خبر پر اپنی رائے کا اظہار کریں